atha bhāveśaphalādhyāyaḥ .. 24..
lagneśe lagnage dehasukhabhāg bhujavikramī .
manasvī cañcalaścaiva dvibhāryo parago’pi va .. 1..
lagneśe dhanage bālo lābhavān paṇḍitaḥ sukhī .
suśīlo dharmavinmānī bahudāraguṇairyutaḥ .. 2..
lagneśe sahaje jātaḥ siṃhatulyaparākramī .
sarvasampadyuto mānī dvibhāryo matimān sukhī .. 3..
lagneśe sukhage bālaḥ pitṛmātṛsukhānvitaḥ .
bahubhrātṛyutaḥ kāmī guṇarūpasamanvitaḥ .. 4..
lagneśe sutage jantoḥ sutasaukhyaṃ ca madhyamam .
prathamāpatyanāśaḥ syānmānī krodhī nṛpapriyaḥ .. 5..
lagneśe ṣaṣṭhage jāto dehasaukhyavivarjitaḥ .
pāpāḍhye śatrutaḥ pīḍā saumyadṛṣṭivivarjite .. 6..
lagneśe saptame pāpe bhāryā tasya na jīvati .
śubhe’ṭano daridro vā virakto vā nṛpo’pi vā .. 7..
lagneśe’ṣṭamage jātaḥ siddhavidyāviśāradaḥ .
rogī cauro mahākrodhī dyūtī ca paradāragaḥ .. 8..
lagneśe bhāgyage jāto bhāgyavāñjanavallabhaḥ .
viṣṇubhaktaḥ paṭurvāgmī dāraputradhanairyutaḥ .. 9..
lagneśe daśame jātaḥ pitṛsaukhyasamanvitaḥ .
nṛpamānyo jane khyātaḥ svārjitasvo na saṃśayaḥ .. 10..
lagneśe lābhage jātaḥ sadā lābhasamanvitaḥ .
suśīlaḥ khyātakīrtiśca bahudāraguṇairyutaḥ .. 11..
lagneśe vyayabhāvasthe dehasaukhyavivarjitaḥ .
vyarthavyayī mahākrodhī śubhadṛgyogavarjite .. 12..
dhaneśe lagnage jātaḥ putravān dhanasaṃyutaḥ .
kuṭumbakaṇṭakaḥ kāmī niṣṭhuraḥ parakāryakṛt .. 13..
dhaneśe dhanage jāto dhanavān garvasaṃyutaḥ .
dvibhāryo bahubhāryo vā sutahīnaḥ prajāyate .. 14..
dhaneśe sahaje jāto vikramī matimān guṇī .
kāmī lobhī śubhāḍhye ca pāpāḍhye devanindakaḥ .. 15..
dhaneśe sukhabhāvasthe sarvasampatasamanvitaḥ .
guruṇā saṃyute svocce rājatulyo naro bhavet .. 16..
dhaneśe sutabhāvasthe jāto dhanasamanvitaḥ .
dhanopārjanaśīlāśca jāyante tatsutā api .. 17..
dhaneśe ripubhāvasthe saśubhe śatruto dhanam .
sapāpe śatruto hānirjaṃghāvaikalyavān bhavet .. 18..
dhaneśe saptame jātaḥ paradārarato bhiṣek .
pāpekṣitayute tasya bhāryā ca vyabhicāriṇī .. 19..
dhaneśe’ṣṭamage jāto bhūribhūmidhanairyutaḥ .
patnīsukhaṃ bhavet svalpaṃ jyeṣṭhabhrātṛsukhaṃ na hi .. 20..
dhaneśe dharmabhāvasthe dhanavānudyamī paṭuḥ .
bālye rogī sukhī paścāt tīrthadharmavratādikṛt .. 21..
dhaneśe karmage jātaḥ kāmī mānī ca paṇḍitaḥ .
bahudāryadhanairyuktaḥ kiñca putrasukhojjhitaḥ .. 22..
dhaneśe lābhabhāvasthe sarvalābhasamanvitaḥ .
sadodyogayuto mānī kīrtimān jāyate naraḥ .. 23..
dhaneśe vyayabhāvasthe sāhamī dhanavarjitaḥ .
parabhāgyaratastasya jyeṣṭhāpatyasukhaṃ nahi .. 24..
lagnage sahajādhīśe svabhujārjitavittavān .
sevājñaḥ sāhasī jāto vidyāhīno’pi buddhimān .. 25..
dvitīye sahajādhīśe sthūlo vikramavarjitaḥ .
svalpārambhī sukhī na syāt parastrīdhanakāmukaḥ .. 26..
sahaje sahajādhīśe sahodarasukhānvitaḥ .
dhanaputrayuto hṛṣṭo bhunakti sukhamadbhutam .. 27..
sukhasthe sahajādhīśe sukhī ca dhanasaṃyutaḥ .
matimān jāyate bālo duṣṭabhāryāpatiśca saḥ .. 28..
sutasthe sahajādhīśe putravān guṇasaṃyutaḥ .
bhāryā tasya bhavet krūrā krūragrahayutekṣite .. 29..
ṣaṣṭhabhāve trtīyeśe bhrātṛśatrurmahādhanī .
mātulaiśca samaṃ vairaṃ mātulānīpriyo naraḥ .. 30..
saptame sahajādhīśe rājasevāparo naraḥ .
bālye duḥkhī sukhī cānte jāyate nā’tra saṃśayaḥ .. 31..
aṣṭame sahajādhīśe jātaścairo naro bhavet .
dāsavṛttyopajīvī ca rājadvāre mṛtirbhavet .. 32..
navame sahajādhīśe pituḥ sukhavivarjitaḥ .
strībhirbhāgyodayastasya putrādisukhasaṃyutaḥ .. 33..
daśame sahajādhīśe jātaḥ sarvasukhānvitaḥ .
svabhujārjivittaśca duṣṭastrībharaṇe rataḥ .. 34..
lābhage sahajādhīśe vyāpāre lābhavān sadā .
vidyāhīno’pi medhāvī sāhasī parasevakaḥ .. 35..
vyayasthe sahajādhīśe kutārye vyayakṛjjanaḥ .
pitā tasya bhavet krūraḥ strībhirbhāgyodayastathā .. 36..
sukheśe dhanage jāto vidyāguṇavibhūṣitaḥ .
bhūmīvāhanasaṃyukto mātuḥ sukhasamanvitaḥ .. 37..
sukheśe dhanage jāto bhogī sarvadhanānvitaḥ .
kuṭumbasahito mānī sāhasī kuhakānvitaḥ .. 38..
sukheśe sahaje jāto vikramī bhṛtyasaṃyutaḥ .
udāro’rug guṇī dātā svabhujārjitavittavān .. 39..
sukheśe sukhabhāvasthe mantrī sarvadhanānvitaḥ .
caturaḥ śīlavān mānī jñānavān strīpriyaḥ sukhī .. 40..
sukheśe putrabhāvasthe sukhī sarvajanapriyaḥ .
viṣṇubhakto guṇī mānī svabhujārjitavittavān .. 41..
sukheśe ripubhāvasthe mātuḥ sukhavivarjitaḥ .
krodhī coro’bhicārī ca svecchācāraśca durmanāḥ .. 42..
sukheśe saptame jāto bahuvidyāsamanvitaḥ .
pitrārjitadhanatyāgī sabhāyāṃ mūkavad bhavet .. 43..
sukheśe randhrabhāvasthe gṛhādisukhavarjitaḥ .
pitroḥ sukhaṃ bhavedalpaṃ jātaḥ klībasamo bhavet .. 44..
sukheśe bhāgyabhāvasthe jātaḥ sarvajanapriyaḥ .
devabhakto guṇī mānī bhavet sarvasukhānvitaḥ .. 45..
sukheśe karmabhāvasthe rājamānyo naro bhavet .
rasāyanī mahāhṛṣṭo sukhabhogī jitendriyaḥ .. 46..
sukheśe lābhage jāto guptarogabhayānvitaḥ .
udārī guṇavān dātā paropakaraṇe rataḥ .. 47..
sukheśe vyayabhāvasthe gṛhādisukhavarjitaḥ .
jāto durvyasanī mūḍhaḥ sadā’lasyasamanvitaḥ .. 48..
suteśe lagnage jāto vidyān putrasukhānvitaḥ .
kadaryo vakracittaśca paradravyāpahārakaḥ .. 49..
suteśe dhanage jāto bahuputro dhanānvitaḥ .
kuṭumbapoṣako mānī strīpriyaḥ suyaśā bhuvi .. 50..
suteśe sahaje bhāve jāyate sodarapriyaḥ .
piśunaśca kadaryaśca svakāryanirataḥ sadā .. 51..
suteśe sukhabhāvasthe sukhī mātṛsukhānvitaḥ .
lakṣmīyuktaḥ subuddhiśca rājño’mātyo’thavā guruḥ .. 52..
suteśe sutabhāvaste śubhāḍhye putravān naraḥ .
pāpāḍhye’patyahīno’sau guṇavān mitravatsalaḥ .. 53..
suteśe ripubhāvasthe putraḥ śatrusamo bhavet .
mṛtāpatyo’thavā jāto dattakrītasuto’thavā .. 54..
suteśe saptame mānī sarvadharmasamanvitaḥ .
putrādisukhayuktaśca paropakaraṇe rataḥ .. 55..
suteśe randhrabhāvasthe svalpaputrasukhānvitaḥ .
kāsaśvāsasamāyuktaḥ krodhī ca sukhavarjitaḥ .. 56..
suteśe bhāgyage putro bhapo vā tatsamo bhavet .
svayaṃ vā granthakartā ca vikhyātaḥ kuladīpakaḥ .. 57..
suteśe rājyabhāvasthe rājayogo hi jāyate .
anekasukhabhogī ca khyātakīrtirnaro bhavet .. 58..
suteśe lābhage jāto vidyāvān janavallabhaḥ .
granthakartā mahādakṣo bahuputradhanānvitaḥ .. 59..
suteśe vyayabhāvasthe jātaḥ putrasukhojjñitaḥ .
dattaputrayuto vā’sau krītaputrānvito’thavā .. 60..
ṣaṣṭheśe lagnage jāto rogavān kīrtisaṃyutaḥ .
ātmaśatrurdhanī mānī sāhasī guṇavān naraḥ .. 61..
ṣaṣṭheśe dhanabhāvasthe sāhasī kulaviśrutaḥ .
paradeśī sukhī vaktā svakarmanīrataḥ sadā .. 62..
ṣaṣṭheśe sahajaḥ jātaḥ krodhī vikramavarjitaḥ .
bhrātā śatrusamastasya bhṛtyaścottaradāyakaḥ .. 63..
ṣaṣṭheśe sukhabhāvasthe mātuḥ sukhavivarjitaḥ .
manasvī piśunā dveṣī calacitto’tivittavān .. 64..
ṣaṣṭheśe sutago yasya calaṃ tasya dhanādikam .
śatrutā putramitraiśca sukhī svārthī dayānvitaḥ .. 65..
ṣaṣṭheśe ripubhāvasthe vairaṃ svajñātimaṇḍalāt .
anyaiḥ saha bhaven maitrī sukhaṃ madhyaṃ dhanādijam .. 66..
ṣaṣṭheśe dārabhāvasthe jāto dārasukhojjhitaḥ .
kīrtimān guṇavān mānī sāhasī dhanasaṃyutaḥ .. 67..
ṣaṣṭheśe’ṣṭamage jāto rogī śatrurmanīṣiṇām .
paradravyābhilāṣī ca paradārarato’śuciḥ .. 68..
ṣaṣṭheśe bhāgyage jātaḥ kāṣṭhapāṣāṇavikrayī .
vyavahāre kvaciddhāniḥ kvacidvṛddhiśca jāyate .. 69..
ṣaṣṭheśe daśame bhāve mānavaḥ kulaviśrutaḥ .
abhaktaśca piturvaktā videśe ca sukhī bhavet .. 70..
ṣaṣṭheśe lābhage jātaḥ śatruto dhanamāpnuyāt .
guṇavān sāhasī mānī kintu putrasukhojjhitaḥ .. 71..
ṣaṣṭheśe vyayabhāvasthe vyasane vyayakṛt sadā .
vidvaddveṣī bhavejjāto jīvahiṃsāsu tatparaḥ .. 72..
dāreśe lagnage jātaḥ paradāreṣu lampaṭaḥ .
duṣṭo vicakṣaṇo’dhīro jano vātarujānvitaḥ .. 73..
dāreśe dhanage jāto bahustrībhiḥ samanvitaḥ .
dārayogāddhanāptiśca dīrghasūtrī ca mānavaḥ .. 74..
dāreśe sahaje jāto mṛtāpatyo hi mānavaḥ .
kadācijjāyate putrī yatnāt putro’pi jīvati .. 75..
dāreśe sukhabhāvasthe jāyā nāsya vaśe sadā .
svayaṃ satyapriyo dhīmān dharmātmā dantarogayuk .. 76..
dāreśe pañcame jāto māni sarvaguṇānvitaḥ .
sarvadā harṣayuktaśca tathā sarvadhanādhipaḥ .. 77..
dāreśe ripubhāvasthe bhāryā tasya rujānvitā .
striyā sahā’tha vā vairaṃ svayaṃ krodhī sukhojjhitaḥ .. 78..
dāreśe saptame bhāve jāto dārasukhānvitaḥ .
dhīro vicakṣaṇo dhīmān kevalaṃ vātarogavān .. 79..
dāreśe mṛtyubhāvasthe jāto dārasukhojjhitaḥ .
bhāryā’pi rogayuktā’sya duḥśīlā’pi na cānugā .. 80..
dāreśe dharmabhāvasthe nānāstrībhiḥ samāgamaḥ .
jāyāhṛtamanā jāto bahvārambhakaro naraḥ .. 81..
dāreśe karmabhāvasthe nāsya jāyā vaśānugā .
svayaṃ dharmarato jāto dhanaputrādisaṃyutaḥ .. 82..
dāreśe lābhabhāvasthe dārairarthasamāgamaḥ .
putrādisukhamalpaṃ ca janaḥ kanyaprajo bhavet .. 83..
dāreśe vyayage jāto daridraḥ kṛpaṇo’pi vā .
bhāryā;pi vyayaśīlā’sya vastrājīvī naro bhavet .. 84..
aṣṭameśe tanau jātastanusaukhyavivarjitaḥ .
devānāṃ brāhmaṇānāṃ ca nindako vraṇasaṃyutaḥ .. 85..
aṣṭameśe dhane bāhubalahīnaḥ prajāyate .
dhanaṃ tasya bhavet svalpaṃ naṣṭa vittaṃ na labhyate .. 86..
randhreśe sahaje bhāve bhrātṛsaukhyaṃ na jāyate .
sālasyo bhṛtyahīnaśca jāyate balavarjitaḥ .. 87..
randhreśe sukhabhāvasthe mātṛhīno bhavecchiśuḥ .
gṛhabhūmisukhairhīno mitradrohī na saṃśayaḥ .. 88..
randhreśe sutabhāvasthe jaḍabuddhiḥ prajāyate .
svalpaprajño bhavejjato dīrghāyuśca dhanānvitaḥ .. 89..
randhreśe ripubhāvasthe śatrujetā bhavejjanaḥ .
rogayuktaśarīraśca bālye sarpajalād bhayam .. 90..
randhreśe dārabhāvasthe tasya bhāryādvayaṃ bhavet .
vyāpāre ca bhavedhānistasmin pāpayute dhruvam .. 91..
randhreśe mṛtyubhāvasthe jātā dīrghāyuṣā yutaḥ .
nirbale madhyamāyuḥ syāccauro nindyo’nyanindakaḥ .. 92..
aṣṭameśe tapaḥsthāne dharmadrohī ca nāstikaḥ .
duṣṭabhāryāpatiścaiva paradravyāpahārakaḥ .. 93..
randhreśe karmabhāvaste pitṛsaukhyavivarjitaḥ .
piśunaḥ karmahīnaśca yadi naiva śubhekṣite .. 94..
randhreśe lābhabhāvasthe sapāpe dhanavarjitaḥ .
bālye duḥkhī sukhī paścāt dīrghāyuśca śubhānvite .. 95..
randhreśe vyayabhāvasthe kukārye vyayakṛt sadā .
alpāyuśca bhavejjātaḥ sapāpe ca viśeṣataḥ .. 96..
bhāgyeśe lagnage jāto bhāgyavān bhūpavanditaḥ .
suśīlaśca surūpaśca vidyāvān janapūjitaḥ .. 97..
bhāgyeśe dhanabhāvasthe paṇḍito janavallabhaḥ .
jāyate dhanavān kāmī strīputrādisukhānvitaḥ .. 98..
bhāgyeśe bhrātṛbhāvasthe jāto bhrātṛsukhānvitaḥ .
dhanavān guṇavāṃścāpi rūpaśīlasamanvitaḥ .. 99..
bhāgyeśe turyabhāvasthe gṛhayānasukhānvitaḥ .
sarvasampattiyuktaśca mātṛbhakto bhavennaraḥ .. 100..
bhāgyeśe sutabhāvasthe sutabhāgyasamanvitaḥ .
gurubhaktirato dhīro dharmātmā paṇḍito naraḥ .. 101..
bhāgyeśe ripubhāvasthe svalpabhāgyo bhavennaraḥ .
mātulādisukhairhīnaḥ śatrubhiḥ pīḍitaḥ sadā .. 102..
bhāgyeśe dārabhāvasthe dārayogāt sukhodayaḥ .
guṇavān kīrtimāṃścāpi jāyate dvijasattamaḥ .. 103..
bhāgyeśe mṛtyubhāvasthe bhāgyahīno naro bhavet .
jyeṣṭhabhrātṛsukhaṃ naiva tasya jātasya jāyate .. 104..
bhāgyeśe bhāgyabhāvasthe bahubhāgyasamanvitaḥ .
guṇasaundaryasampanno sahajebhyaḥ sukhaṃ bahu .. 105..
bhāgyeśe karmabhāvasthe jāto rājā’tha tatsamaḥ .
mantrī senāpatirvā’pi guṇavān janapujitaḥ .. 106..
bhāgyeśe lābhabhāvasthe dhanalābho dine dine .
bhakto gurujanānāṃ ca guṇavān puṇyavānapi .. 107..
bhāgyeśo vyayabhāvastho bhāgyahānikaro nṛṇām .
śubhakārye vyayo nityaṃ nirdhano’tithisaṅgamāt .. 108..
karmeśe lagnage jāto vidvān khyāto dhanī kavīḥ .
bālye rogī sukhī paścād dhanavṛddhirdine dine .. 109..
rājyeśe dhanabhāvasthe dhanavān guṇasaṃyutaḥ .
rājamānyo vadānyaśca pitrādisukhasaṃyutaḥ .. 110..
karmeśe sahaje jāto bhrātṛbhṛtyasukhānvitaḥ .
vikramī guṇasampannaḥ vāgmī satyarato naraḥ .. 111..
karmeśe sukhabhāvasthe sukhī mātṛhite rataḥ .
yānabhūmigṛhādhīśo guṇavān dhanavānapi .. 112..
karmeśe sutabhāvasthe sarvavidyāsamanvitaḥ .
sarvadā hṛrṣasaṃyukto dhanavān putravānapi .. 113..
karmeśe ripubhāvasthe pitṛsaukhyavivarjitaḥ .
caturo’pi dhanairhīnaḥ śatrubhiḥ paripīḍitaḥ .. 114..
rājyeśe dārabhāvasthe jāto dārasukhānvitaḥ .
manasvī guṇavān vāgmī satyadharmarataḥ sadā .. 115..
karmeśe randhrabhāvasthe karmahīno bhavennaraḥ .
dīrghāyurapyasau jātaḥ paranindāparāyaṇaḥ .. 116..
rājyeśe bhāgyabhe jāto rājā rājakulodbhavaḥ .
tatsamo’nyakulotpanno dhanaputrādisaṃyutaḥ .. 117..
karmeśe rājyabhāvasthe sarvakarmapaṭuḥ sukhī .
vikramī satyavaktā ca gurubhaktirato naraḥ .. 118..
rājyeśe lābhabhāvasthe jāto dhanasutānvitaḥ .
harṣavān guṇavāṃścāpi satyavaktā sadā sukhī .. 119..
rājyeśe vyayabhāvasthe tasya rājagṛhe vyayaḥ .
śatruto’pi bhayaṃ nityaṃ caturaścāpi cintitaḥ .. 120..
lābheśe lagnage jātaḥ sāttviko dhanavān sukhī .
samadṛṣṭiḥ kavirvāgmī sadā lābhasamanvitaḥ .. 121..
lābheśe dhanabhāvasthe jātaḥ sarvadhanānvitaḥ .
sarvasiddhiyuto dātā dhārmikaśca sukhī sadā .. 122..
lābheśe sahaje jātaḥ kuśalaḥ sarvakarmasu .
dhanī bhrātṛsukhopetaḥ śūlarogabhayaṃ kvacit .. 123..
lābheśe sukhabhāvasthe lābho mātṛkulād bhavet .
tīrthayātrākaro jāto gṛhabhūmisukhānvitaḥ .. 124..
lābheśe sutabhāvasthe bhavanti sukhinaḥ sutāḥ .
vidyavanto’pi sacchīlāḥ svayaṃ dharmarataḥ sukhī .. 125..
lābheśe rogabhāvasthe jāto rogasamanvitaḥ .
krūrabuddhiḥ pravāsī ca śatrubhi paripīḍitaḥ .. 126..
lābheśe dārabhāvasthe lābho dārakulāt sadā .
udāraśca guṇī kāmī jano bhāryāvaśānugaḥ .. 127..
lābheśe randhrabhāvasthe hāniḥ kāryeṣu jāyate .
tasyāyuśca bhaveddīrghaṃ prathamaṃ maraṇaṃ striyaḥ .. 128..
labheśe bhāgyabhāvasthe bhāgyavān jāyate naraḥ .
caturaḥ satyavādī ca rājapujyo dhanādhipaḥ .. 129..
lābheśe karmabhāvasthe bhūpavandyo guṇānvitaḥ .
nijadharmarato dhīmān satyavādī jitendriyaḥ .. 130..
lābheśe lābhabhāvasthe lābhaḥ sarveṣu karmasu .
paṇḍityaṃ ca sukhaṃ tasya varddhate ca dine dine .. 131..
lābheśe vyayabhāvasthe satkāryeṣu vyayaḥ sadā .
kāmuko bahupatnīko mlecchasaṃsargakārakaḥ .. 132..
vyayeśe lagnage jāto vyayaśīlo jato bhavet .
durbalaḥ kapharogī ca dhanavidyāvivarjitaḥ .. 133..
vyayeśe dhanabhāvasthe śubhakārye vyayaḥ sadā .
dhārmikaḥ priyavādī ca guṇasaukhyasamanvitaḥ .. 134..
vyayeśe sahaje jāto bhrātṛsaukyavivarjitaḥ .
bhavedanyajanadveṣī svaśarīrasya poṣakaḥ .. 135..
vyayeśe sukhabhāvasthe mātuḥ sukhavivarjitaḥ .
bhūmiyānagṛhādīnāṃ hānistasya dinedine .. 136..
vyayeśe sutabhāvasthe sutavidyāvivarjitaḥ .
putrārthe ca vyayastasya tīrthāṭanaparo naraḥ .. 137..
vyayeśe ripubhāvasthe jātaḥ svajanavairakṛt .
krodhī pāpī ca duḥkhī ca parajāyārato naraḥ .. 138..
vyayeśe dārabhāvasthe vyayo dārakṛtaḥ sadā .
tasya bhāryāsukhaṃ naiva balavidyāvivarjitaḥ .. 139..
vyayeśe mṛtyubhāvasthe jāto lābhānvitaḥ sadā .
priyavāṅ madhyamāyuśca sampūrṇaguṇasaṃyutaḥ .. 140..
vyayeśe bhāgyabhāvasthe gurudveṣī bhavennaraḥ .
mitrairapi bhavedvairaṃ svārthasādhanatatparaḥ .. 141..
vyayeśe rājyabhāvasthe vyayo rājakulādbhavet .
pitṛto’pi sukhaṃ tasya svalpameva hi jāyate .. 142..
vyayeśe lābhabhāvasthe lābhe hāniḥ prajāyate .
pareṇa rakṣitaṃ dravyaṃ kadācillabhate naraḥ .. 143..
vyayeśe vyayabhāvasthe vyayādhikyaṃ hi jāyate .
na śarīrasukhaṃ tasya krodhī dveṣaparo nṛṇām .. 144..
iti te kathitaṃ vipra bhāveśānāṃ ca yat phalam .
balābalavivekena sarveṣaṃ tatsamādiśet .. 145..
dvirāśīśasya kheṭasya viditvobhayathā phalam .
virodhe tulyaphalayordvayornāśaḥ prajāyate .. 146..
vibhinnayostu phalayordvayoḥ prāptirbhaveddhruvam .
grahe pūrṇabale purṇamardhamardhabale phalam .. 147..
pādaṃ hīnabale kheṭe jñeyamitthaṃ budhairiti .
uktaṃ bhāvasthitānāṃ te bhāveśānāṃ palaṃ mayā .. 148..
