atha viśeṣalagnādhyāyaḥ .. 5..

athāhaṁ sampravakṣyāmi tavāgre dvijasattama .
bhāvahorāghaṭīsaṁjñalagnānīti pṛthak pṛthak .. 1..
sūryodayaṁ samārabhya ghaṭikānāṁ tu paṁcakam .
prayāti janmaparyantaṁ bhāvalagnaṁ tadeva hi .. 2..
iṣṭaṁ ghaṭyādikaṁ bhaktvā paṁcabhirbhādijaṁ phalam .
yojyamaudayike sūrye bhāvalagnaṁ sphuṭaṁ ca tat .. 3..
tathā sārdhadvighaṭikāmitādarkodayād dvija .
prayāti lagnaṁ tannāma horālagnaṁ pracakṣate .. 4..
iṣṭaghaṭyādikaṁ dvighnaṁ pañcāptaṁ bhādikaṁ ca yat .
yojyamaudayike bhānau horālagnaṁ sphuṭaṁ hi tat .. 5..
kathayāmi ghaṭīlagnaṁ sṛnu tvaṁ dvijasattama .
sūryodayat samārabhya janmakālāvadhi kramāt .. 6..
ekaikaghaṭikāmānāt lagnaṁ yadyāti bhādikam .
tadeva ghaṭikālagnaṁ kathitaṁ nāradādibhiḥ .. 7..
rāśayastu ghaṭītulyāḥ palārdhapramitāṁśakāḥ .
yojyamaudayike bhanau ghaṭīlagnaṁ sphuṭaṁ hi tat .. 8..
kramādeṣāṁ ca lagnānāṁ bhāvakoṣṭhaṁ pṛthak likhet .
ye grahā yatra bhe tatra te sthāpyā rāśilagnavat .. 9..
varṇadākhyadaśāṁ bhānāṁ kathayāmyatha te’grataḥ .
yasya vijñānamātreṇa vadedāyurbhavaṁ phalam .. 10..
ojalagnaprasūtānāṁ meṣādergaṇayet kramāt .
samalagnaprasūtānām mīnāderapasavyataḥ .. 11..
meṣamīnādito janmalagnāntaṁ gaṇayet sudhīḥ .
tathaiva horālagnāntaṁ gaṇayitvā tataḥ param .. 12..
ojatvena samatvena sayātīye ubhe yadi .
tarhi saṁkhye yojayīta vaijātye tu viyojayet .. 13..
meṣamīnāditaḥ paścādyo rāśiḥ sa tu varṇadaḥ .
etatprayojanaṁ vakṣye sṛṇu tvaṁ dvijapuṁgavaḥ .
horālagnabhayorneyā sabalādvarṇadā daśā .. 14..
yatsaṁkhye varṇado lagnāt tattatsaṁkhyākrameṇa tu .
kramayutkramabhedena daśā syādojayugmayo .. 15..
pāpadṛṣṭiḥ pāpayogo varṇdasya trikoṇake .
yadi syāt tarhi tadrāśiparyantaṁ tasya jīvanaṁ .. 16..
rudraśūle yathaivāyurmaraṇādi nirūpyate .
tathaiva varṇadasyapi trikoṇe pāpasaṁgame .. 17..
varṇadādapi bho vipra lagnavaccintayet phalam .
varṇadāt saptamād bhāvat kalatrāyurvicintayet .. 18..
ekādaśādagrajasya tṛtīyāttu yavīyasaḥ .
sutasya paṁcame vidyānmātuścaturthabhāvat .. 19..
pituśca navamād bhāvādayurīvaṁ vicintayet .
śūlarāśidaśāyāṁ vai pravalāyāmariṣṭakam .. 20..
evaṁ tanvādibhāvānāṁ kartavyā varṇā daśā .
pūrvavacca phalaṁ jñeyaṁ dehināṁ ca śubhāśubham .. 21..
grahanāṁ varṇadā naiva rāśīnāṁ varṇdā daśā .
kṛtvārkadhā rāśidaśāṁ kramādantardaśāṁ vadet .. 22..
evamantardaśādiṁ ca kṛtvā tena phalaṁ vadet .
kramavyutkramabhedena likhedantardaśāmapi .. 23..
svasvadeśodbhavaṁ lagnaṁ janmalagnamimihocyate .
bhāvahorādilagnānāṁ sarvatraiva samakriyā .. 24..